Nju Jork, 12 gusht 2022 – Shkrimtari Salman Rushdie u plagos të premten teksa ishte gati të fliste në institutin “Chautauqua”, në Nju Jork.
Sipas Associated Press, një burrë hipi në skenë dhe e sulmoi shkrimtarin 75-vjeçar pas prezantimit, ndërsa ky i fundit u rrëzua. Sulmuesi më pas u ndalua nga policia.
Policia e shtetit të Nju Jorkut tha se shkrimtari Salman Rushdie ka një plagë në qafë, e cila është shkaktuar nga sulmi me thikë.
Po sipas deklaratës së policisë së Nju Jorkut, shkrimtari 75-vjeçar u transportua me helikopter në një spital, ndërsa sulmuesi ndodhet në paraburgim.
Gjendja shëndetësore e shkrimtarit ende nuk dihet.
Libri i shkrimtarit Salman Rushdie “Vargjet Satanike” është ndaluar në Iran që nga viti 1988, pasi shumë muslimanë e konsiderojnë atë si blasfemi.
Një vit më vonë, në vitin 1989, ish udhëheqësi i Iranit Ayatollah Ruhollah Khomeini, e lëshoi një dekret fetar ku bëhej thirrje për vdekjen e zotit Rushdie.
Qeveria e Iranit është distancuar prej kohësh nga dekreti i Khomeinit, por ndjenjat anti-Rushdie kanë mbetur. Në vitin 2012, një fondacion fetar gjysmë zyrtar iranian e rriti shpërblimin për vrasjen e shkrimtarit Rushdie nga 2.8 milionë dollarë në 3.3 milionë dollarë.
Zoti Rushdie e hodhi poshtë kërcënimin, duke thënë se nuk kishte “asnjë prove” se njerëzit ishin të interesuar për shpërblimin.
Rushdie u bë i njohur me romanin e tij të vitit 1981, fitues i çmimit Booker, “Midnight’s Children”, por libri “Vargjet Satanike” i dha atij njohje në mbarë botën.
Institucioni Chautauqua, rreth 55 milje në jugperëndim të Buffalo-s, është i njohur për serinë e tij të leksioneve gjatë verës. Edhe më herët shkrimtari Rushdie ka folur në këtë institut.
(Zëri i Amerikës)