Prishtinë, 11 korrik 2022 – Në Prizren, të hënën, më 11 korrik, u zhvillua një manifestim përkujtimor për viktimat e gjenocidit në Srebrenicë. Disa dhjetra qytetarë, pjesëtarë të komunitetit boshnjak dhe përfaqësues të komuniteteve tjera që jetojnë në Kosovë, morën pjesë në “Marshin e Paqes” që përfundoi me një performancë kushtuar viktimave të gjenocidit në Srebrenicë dhe me lëshimin e pëllumbave të bardhë, si simbol i paqes.
Në këtë manifestim përkujtimor me moton “Nuk e harroj Srebrenicën”, që u zhvillua në 27-vjetorin e gjenocidit në Srebrenicë, morën pjesë edhe përfaqësues të boshnjakëve nga Novi Pazari, qytet në Serbi.
Organizatori i manifestimit, Edis Jonuzi, tha se 11 korriku i vitit 1995, kur forcat serbe i ekzekutuan në Srebrenicë mbi 8,000 burra dhe djem boshnjakë, nuk duhet të harrohet kurrë.
“Sot nuk jemi në Potoçari me nënat e Srebrenicës, por ato janë në zemrat dhe mendjet tona. Prandaj, nga këtu, ne boshnjakët, shqiptarët, turqit, romët dhe të tjerët nderojmë viktimat”, tha Jonuzi.
Kjo është hera e pestë që në Prizren mbahet marsh paqeje në nderim të viktimave të gjenocidit.
Rasim Demiri, përfaqësues i koalicionit “Vakat”, theksoi se “gjenocidi në Srebrenicë nuk ndodhi, por ishte planifikuar nga agresori serb”.
Në Marshin e Paqes në Prizren kishte i pranishëm edhe ambasadori i Turqisë në Kosovë, Çagri Sakar.
“Ne po vazhdojmë të bëjmë përpjekje për të krijuar paqe dhe stabilitet në gjithë Ballkanin dhe më gjerë, në mënyrë që masakrat e së kaluarës të mos përsëriten”, tha Sakar.
Para mbajtjes së marshit, përmes rrjeteve sociale, kryeministri i Kosovës, Albin Kurti, tha se Serbia paturpshëm e mohon gjenocidin në Srebrenicë, ndërkaq presidentja Vjosa Osmani, tha se “të gjithë duhet të bashkohemi kundër përpjekjeve për të madhëruar ose mohuar këto mizori të tmerrshme”.
Më 7 korrik 2021, Kuvendi i Kosovës miratoi Rezolutën për Srebrenicën, që dënon gjenocid e regjimit serb ndaj pjesëtarëve të kombit boshnjak. Kjo rezolutë dënon ashpër mohimin e gjenocidit dhe 11 korrikun e shpall Ditë të Përkujtimit të Gjenocidit në Srebrenicë.
Në vitin 2007, Gjykata Ndërkombëtare në Hagë tha se në Srebrenicë ishte kryer gjenocid.
Më 8 qershor të vitit 2021, gjyqtarët e gjykatës së OKB-së konfirmuan dënimin me burgim të përjetshëm ndaj ish-komandantit të Ushtrisë së Republikës Sërpska, Ratko Mlladiq. Ai u shpall fajtor për gjenocid në Srebrenicë, persekutim, krime kundër njerëzimit, shfarosje dhe krime të tjera lufte në Bosnjë e Hercegovinë, të kryera ndërmjet viteve 1992 dhe 1995.
Në fund të korrikut të vitit 2021, ish-përfaqësuesi i Lartë në Bosnjë e Hercegovinë, Valentin Inzko, bëri ndryshime në Kodin Penal të këtij shteti, duke ndaluar mohimin e gjenocidit dhe krimeve të tjera të luftës dhe madhërimit të kriminelëve të luftës.
(Refki Alija, REL)