Moskë, 5 qershor 2024 – Policia e Moskës ka ndaluar dy gra, të cilat shkuan për të bërë nderime në varrin e kritikut të ndjerë të Kremlinit, Aleksei Navalny, në varrezat e Borisovit, raportoi grupi OVD-Info, duke cituar një dëshmitar.
Mbështetës dhe familjarë të politikanit opozitar e shënuan ditën kur Navalny do të duhej t’i mbushte 48 vjet, më 4 qershor.
Organizime u mbajtën jashtë Rusisë, derisa brenda territorit rus shumë njerëz kanë shkuar te varri i tij për ta kujtuar, pavarësisht paralajmërimeve për tubimet e paautorizuara.
Policia fillimisht e ndaloi në varreza një grua të re, për gjoja shfaqjen e simboleve ekstremiste, kurse më pas e ndaloi një grua tjetër që i bëri thirrje policisë që të mos e ndalonte gruan e re.
Në Novosibirsk, policia arrestoi dy gra që kishin shkuar për të vendosur lule në monumentin e viktimave të represionit politik – një vend i përdorur nga aktivistët për të nderuar kujtimin e Navalnyt.
Vdekja e Navalnyt është bërë e ditur më 16 shkurt në burgun Ujku Polar në Arktik të Rusisë, ku ka qenë duke vuajtur një dënim me burgim, lidhur me akuzat për ekstremizëm, të cilat, ai dhe mbështetësit e tij, i kanë konsideruar si të motivuara politikisht.
Navalny është përballur me kushte të rënda në burg, mirëpo zyrtarët rusë kanë thënë se ai ka vdekur prej “kushteve natyrale” dhe kanë refuzuar të dorëzojnë trupin e tij te familjarët për më shumë se një javë.
Navalny ishte arrestuar në janar të vitit 2021, menjëherë pas kthimit në Rusi nga Gjermania, ku është trajtuar pas një helmimi, gati fatal, me agjent nervor Noviçok.
Ai ka thënë vazhdimisht se helmimin e kanë kryer zyrtarë rusë, me urdhër të presidentit rus, Vladimir Putin.
Gruaja e Navalnyt konsideron që burri i saj është vrarë, derisa presidenti amerikan, Joe Biden, dhe disa zyrtarë tjerë perëndimorë kanë thënë se Moska është përgjegjëse për vdekjen e tij.