Nju Jork, 23 korrik 2022 – Sekretari i Përgjithshëm i OKB-së Antonio Guterres, dënoi të shtunën sulmet në portin e Odesës në Ukrainë.
Zëdhënësi i tij, Farhan Haq, vuri në dukje se të dy palët e përfshira në luftime, Moska dhe Kievi, ishin zotuar të premten për një marrëveshje për eksportin e drithërave nga portet e Ukrainës.
“Këto produkte nevojiten me dëshpërim për të trajtuar krizën globale të ushqimit dhe për të lehtësuar vuajtjet e miliona njerëzve në nevojë në mbarë globin”, thuhej në një deklaratë të zëdhënësit të OKB-së Farhan Haq.
“Zbatimi i plotë (i marrëveshjes) nga Federata Ruse, Ukraina dhe Turqia është thelbësore”, theksohet në deklaratë.
Zëdhënësi i Ministrisë së Jashtme të Ukrainës, Oleg Nikolenko, tha se nëse marrëveshja nuk përmbushet, Rusia do të mbajë përgjegjësi të plotë për krizën globale të ushqimit.
Ministria britanike e Mbrojtjes njoftoi sot në mëngjes se në 48 orët e fundit janë zhvilluar luftime të ashpra në Ukrainë. Forcat ukrainase kanë vazhduar ofensivën e tyre kundër forcave ruse në rajonin Khersonit, në perëndim të lumit Dnipro.
“Rusia ka të ngjarë të përpiqet të ngadalësojë ofensivën ukrainas duke përdorur sulme me artileri”, thuhet në deklaratën e ministrisë të postuar në Twitter.
Në deklaratë thuhet gjithashtu se linjat e furnizimit të forcave ruse në perëndim të lumit Dnipro janë gjithnjë e më shumë të rrezikuara.
SHBA-të i kanë premtuar Ukrainës një paketë të re ndihme prej 270 milionë dollarësh, ku përfshihen edhe katër sisteme raketash me lëvizshmëri të lartë të njohura si sistemet HIMARS.
Ushtria e Ukrainës ka dislokuar tashmë të paktën tetë HIMARS në vijën e frontit, ndërsa katër të tjerë janë në pozicione të tjera.
Premtimi i fundit i SHBA-ve e çon në 16 numrin e përgjithshëm të sistemeve HIMARS që ka Kievi. Krahas kësaj, Ukraina ka dislokuar edhe gjashtë sisteme raketash me rreze të mesme e të gjatë veprimi të furnizuara nga Gjermania dhe Britania.
Të premten Ukraina dhe Rusia nënshkruan marrëveshje që i hap rrugë Kievit të eksportojë miliona tonë drithë në mbarë botën.
Ukraina, një nga furnizuesit kryesorë të këtij produkti nuk ka qenë në gjendje të eksportojë grurë për shkak të sulmit rus.
Presidenti ukrainas Volodymyr Zelenskyy tha se pritet të eksportohen rreth 20 milionë tonë drithë ndërsa bëri të ditur se vendi i tij ka aktualisht një sasi drithi në vlerën e rreth 10 miliardë dollarëve.
(Zëri i Amerikës)