Prishtinë, 16 maj 2023 – Presidentja e Kosovës, Vjosa Osmani, ka thënë se kërkesat që Asociacioni të jetë parakusht për zbatimin e neneve të tjera të marrëveshjes Kosovë-Serbi nuk e ndihmojnë procesin e dialogut.
Presidentja Osmani ka theksuar se janë të gabuara interpretimet e reja të BE-së, sipas të cilave Kosova duhet të dalë përtej asaj që është e shkruar në letër.
Ajo ka theksuar se Kosovës nuk duhet t’i kërkohet të bëjë diçka që nuk është fare në marrëveshje.
Presidentja Osmani i ka bërë këto komente pas ceremonisë së themelimit të shoqatës së miqësisë Kosovë-Austri.
Me këtë rast, ajo konfirmoi se do të marrë pjesë në ceremoninë e inaugurimit të presidentit të ri të Malit të Zi që do të mbahet të shtunën.
(r.m.)