Podgoricë, 6 gusht 2023 – Presidenti i Malit të Zi, Jakov Milatoviq, ka thënë se njohja e pavarësisë së Kosovës, anëtarësimi i Malit të Zi në NATO dhe sanksionet ndaj Rusisë janë punë e përfunduar.
“Njohja e pavarësisë së Kosovës, anëtarësimi i vendit në NATO dhe sanksionet ndaj Rusisë, si pjesë e politikës së përbashkët të jashtme dhe të sigurisë të BE-së, janë punë e përfunduar”, u shpreh Milatoviq për RTV e Sllovenisë.
Në përgjigje të pyetjeve në lidhje me marrëdhëniet e Malit të Zi me Serbinë dhe me Rusinë si edhe në lidhje ndikimin e Kishës Ortodokse Serbe, Milatoviq ka thënë se ish-presidenti i Malit të Zi, Milo Gjukanoviq, e kishte futur çështjen e kishës në politikën e përditshme.
“Mendoj se tani politikanët në Mal të Zi janë fokusuar në çështjet që kanë rëndësi thelbësore për qytetarët, përkatësisht standardet ekonomike dhe të jetesës, sundimi i ligjit dhe integrimi evropian. Përderisa na ndanë dhe u fokusuan në ato ndarje ndodhi që një rreth i vogël njerëzish të lidhur me strukturën e mëparshme qeverisëse u pasuruan shumë, duke i frikësuar vazhdimisht njerëzit dhe duke promovuar gënjeshtra të ndryshme për këtë apo atë ndikim në Mal të Zi, pikërisht për aq kohë ata qëndruan në pushtet”, ka thënë ai.
Milatoviq ka thënë se gjatë mandati të tij do të fokusohet në pprocesin e inegrimit të Malit të Zi në Bashkimin Evropian dhe se shpreson që të gjitha subjektet politike do të angazhohen në këtë drejtim.
“Dhe kjo më shqetëson më së shumti, nëse së bashku si shoqëri do të arrijmë të bashkohemi rreth disa gjërave të përbashkëta, apo nëse do të vazhdojmë të bëjmë qarqe dhe të jemi pjesë, në kuptimin më të keq të fjalës, e Ballkanit. dhe të mos dilni prej saj drejt diçkaje që nënkupton një histori më të organizuar evropiane”, tha Milatoviq.
(abcnews.al)