Kopenhagë, 21 janar 2026 – Ministri i jashtëm i Danimarkës, Lars Lokke Rasmussen, e cilësoi si gjë “pozitive” që Presidenti i Shteteve të Bashkuara të Amerikës, Donald Trump, dëshiron ta shmangë përdorimin e forcës ushtarake në Grenlandë.
Por, ai theksoi se presidenti amerikan nuk ka hequr dorë nga kërcënimi për të marrë këtë ishull në Arktik.
“Çfarë është mjaft e qartë pas këtij fjalimi është se synimi i presidentit mbetet i pandryshuar”, tha Rasmussen për gazetarët në Kopenhagë, duke iu referuar fjalimit të Trumpit në Forumin Ekonomik Botëror në Davos.
“Natyrisht, është pozitive në mënyrë të veçantë që presidenti tha këtë për ushtrinë, por kjo nuk e zgjidh problemin”, shtoi ai.
Rasmussen e përsëriti se Grenlanda nuk është në shitje.
“Nuk do të negociojmë kurrë duke hequr dorë nga parimet themelore. Ne po jetojmë në vitin 2026, në një rend ndërkombëtar të bazuar në ligj, sovranitet shtetëror dhe të drejtën e popujve për vetëvendosje. Një rend që vetë Shtetet e Bashkuara ndihmuan të ndërtohej pas Luftës së Dytë Botërore”, tha ai.
Rasmussen tha gjithashtu se e mirëpret njoftimin e Presidentit amerikan për të hequr dorë nga vendosja e tarifave shtesë ndaj tetë vendeve evropiane për shkak të Grenlandës.
Në një intervistë me transmetuesin kombëtar danez DR, ai përsëriti se për Danimarkën është e rëndësishme ta përfundojë këtë çështje në një mënyrë që e nderon popullin e Grenlandës.
“SHBA-ja nuk ka për ta zotëruar Grenlandën. Kjo është vijë e kuqe”, shtoi Rasmussen.
(r.m.)