Prishtinë, 20 tetor 2022 – Ambasadori i Gjermanisë në Kosovë, Jorn Rohde, ka thënë se Procesi i Berlinit, po kthehet sërish në Berlin dhe se ai tani do të kryesohet nga kancelari Olaf Scholz.
Rohde ka thënë se ministrat e gjashtë vendeveee të Ballkanit Perëndimor do të shkojnë nesër në Berlin, për të diskutuar për disa tema.
“Procesi i Berlinit po kthehet në Berlin, i kryesuar nga Gjermania dhe i organizuar nga kancelari, Olaf Scholz. Gjatë ditës së nesërme, ministrat e brendshëm, të jashtëm dhe të energjisë të gjashtë vendeve të Ballkanit Perëndimor do të diskutojnë luftimin e krimit të organizuar, tregu i përbashkët rajonal dhe agjenda e gjelbër”, ka shkruar Rohde në një postim në Twitter.
1/3 The Berlin Process is coming back to Berlin, chaired by 🇩🇪 and hosted by Chancellor Olaf Scholz. Over the next day’s interior, foreign and energy ministers of the WEB6 will discuss Combating Org. Crime, Common Regional Market and the Green Agenda. https://t.co/kTFgBYnB4q
— Ambassador Jörn Rohde (@GermanAmbKOS) October 20, 2022
“Është thelbësore të shfrytëzohet kjo mundësi, të ndërmerren hapa të rëndësishëm për thellimin e bashkëpunimit rajonal dhe nënshkrimin e marrëveshjeve konkrete në mënyrë që të sjellë përfitime për qytetarët e gjashtë vendeve të Ballkanit Perëndimor”, ka shkruar ai.
“Gjermania është e vendosur fort për të mbështetur dhe lehtësuar këtë proces dhe është e gatshme të marrë drejtimin për të nxitur sa më shpejt anëtarësimin e gjashtë vendeve të Ballkanit Perëndimor në Bashkimin Evropian!”, ka shkruar Rohde.
2/3 It is crucial to use these opportunity, take important steps to deepen regional cooperation and sign concrete agreements in order to bring benefits for the citizens of the WEB6.
— Ambassador Jörn Rohde (@GermanAmbKOS) October 20, 2022
Para disa muajsh, ambasadori Rohde ka thënë se kancelari gjerman po e promovon Procesin e Berlinit, por nuk do të kundërshtojnë shtetet që duan të fuqizojnë bashkëpunimin rajonal përmes iniciativës “Ballkanit të Hapur”.
Por, ai ka ngritur çështjen nëse kjo iniciativë do të jetë gjithëpërfshirëse.
“Për momentin kjo nuk po duket e tillë, sepse janë disa vende që nuk janë pjesë e ‘Ballkanit të Hapur’”, është shprehur ai.
Procesi i Berlinit është një iniciativë diplomatike për normalizimin e marrëdhënieve ndërmjet gjashtë vendeve të Ballkanit Perëndimor, përmes infrastrukturës, zhvillimit ekonomik, shkëmbimeve rinore, si parapërgatitje për integrimin e tyre në Bashkimin Evropian.
Nisma, e cila është mbështetur edhe nga Komisioni Evropian, është ndërmarrë më 28 gusht të vitit 2014 nga ish-kancelarja Angela Merkel, nën presence të kryeministrave, ministrave të punëve të jashtme dhe ministrave të ekonomisë së vendeve të Ballkanit Perëndimor. Disa nga sukseset më të rëndësishme të këtij procesi janë marrëveshja për heqjen e çmimeve roaming, krijimi i korridoreve të gjelbra të transportit për të përshpejtuar procedurat kufitare, themelimi i Zyrës Rajonale të Bashkëpunimit Rinor (RYCO) dhe marrëveshja për krijimin e një tregu të përbashkët.
Ndryshe nga ky proces, Shqipëria, Serbia dhe Maqedonia e Veriut kanë ndërmarrë një nismë tjetër për integrim të vendeve të rajonit, me emrin “Ballkani i Hapur”. Tri vendet tjera të rajonit (Kosova, Mali i Zi dhe Bosnja e Hercegovina nuk kanë pranuar t’i bashkohen kësaj nisme.
(r.m.)