Prishtinë, 4 tetor 2025 – Ish-ndihmëssekretari amerikan, James Rubin, ka kritikuar Gjykatën Speciale për “anshmëri” në procesin gjyqësor ndaj ish-krerëve të Ushtrisë Çlirimtare të Kosovës. Ao ka thënë se këtë e vuri re gjatë dëshmisë që ai dha para trupit gjykues në Hagë, si dëshmitar i mbrojtjes së ish-presidentit Hashim Thaçi.
Rubin ka theksuar se kjo gjykatë po funksionon në kundërshtim me atë që ai e ka parë si parim të tribunaleve për krime lufte.
“Ky gjyq po fajëson liderët e UÇK-së për gjërat që ndodhën dhe mbi të cilat ata nuk i kishin nën kontroll… Ishte e qartë se Thaçi si një djalë i ri në atë kohë, nuk kishte kontroll mbi asgjë. Dëshmova për tre ditë, por më duhet të them se gjyqtarët, për habinë time, më parashtronin pyetje që dukeshin jashtëzakonisht të anshme. Nuk dukeshin si pyetje që kishin të bënin me gjetje faktike. Prokurorët duhet ta ndërtojnë rastin, mbrojtja paraqet argumentet, gjyqtarët supozohet të mbledhin provat që të ulen dhe të marrin vendimin, por nga pyetjet që mora nga disa gjyqtarë kisha ndjenjën se ata tashmë kishin vendosur se UÇK-ja ishte një organizatë që funksiononte në mënyrë perfekte dhe që Hashim Thaçi ishte në krye të saj, gjë që nuk është e vërtetë”, ka thënë Rubin në një intervistë për podkastin “The Ex Files” të gazetares së njohur, Christiane Amanpour.
Rubin ka theksuar se Gjykata Speciale do të duhej t’i lironte ish-krerët e UÇK-së pasi, sipas tij, ata nuk kishin përgjegjësi, aftësi dhe as kapacite të urdhëronin apo të kryenin krime të luftës.
“Ky tribunal duhet të bëjë gjënë e duhur, t’i shpallë ata të pafajshëm. Pastaj SHBA dhe Evropa duhet të ulen me udhëheqësit e Kosovës dhe Serbisë dhe ta zgjidhin këtë problem. Nuk ka arsye pse Ballkani të ketë rrezikun që lufta të fillojë përsëri. Ky është problem që mund të zgjidhet me përkrahje të liderëve ndërkombëtarë dhe këta gjykatës që e kuptojnë rolin e tyre t’ua atribuojnë fajin individëve që kishin përgjegjësinë, aftësinë dhe kapacitetin të lejonin krimet e luftës apo t’i urdhëronin vetë, sepse ata të pandehur nuk i kishin këto”, ka thënë Rubin, ndër të tjera.