Uashington / Teheran, 4 prill 2026 – Ekipet amerikane të shpëtimit kanë vazhduar të shtunën kërkimet për një anëtar të ekuipazhit të aeroplanit amerikan F-15E, i cili është zhdukur pas rrëzimit të aeroplanit nga zjarri i armikut në Iran.
Një zyrtar amerikan ka thënë se njëri anëtar i ekuipazhit është gjetur, ndërsa kërkimet për anëtarin e dytë po vazhdojnë.
Më vonë, një zyrtar amerikan konfirmoi se edhe një tjetër Aeroplan luftarak i Forcave Ajrore të SHBA-së, A-10, është rrëzuar në Gjirin Persik dhe se piloti i aeroplanit është shpëtuar.
Mediat shtetërore iraniane raportuan për rrëzimin e të dy avionëve. Zyrtarët iranianë thanë se po kërkohet piloti i zhdukur i avionit të parë dhe u bënë thirrje qytetarëve t’i njoftojnë autoritetet për çdo informacion që mund të çojë në kapjen e tij.
“Forcat ushtarake kanë nisur një operacion kërkimi për të gjetur pilotin luftarak amerikan që u godit më herët sot”, raportoi agjencia iraniane e lajmeve Fars, e afërt me Trupat e Gardës Revolucionare Islamike (IRGC).
Kapja e një anëtari të ekuipazhit nga forcat iraniane mund t’i ndërlikojë më shumë përpjekjet e SHBA-së për t’i shkatërruar plotësisht asetet ushtarake të Teheranit dhe për ta detyruar Teheranin t’i pranojë kushtet e paqes të paraqitura nga Trumpi.
Ushtria amerikane nuk ka komentuar për rrëzimin e dy aeroplanëve, por presidenti i SHBA-së, Donald Trump, i tha NBC Neës se rrëzimi i avionit nuk do të ndikojë në bisedimet me Iranin.
Richard Allen Williams, kolonel në pension i ushtrisë amerikane dhe ish-zyrtar i Divizionit të Investimeve të Mbrojtjes në NATO, ka deklartuar se misionet e tilla zakonisht janë shumë të bashkërenduara dhe të mbrojtura fort.
Ai ka thënë se avionë dhe burime shtesë qëndrojnë në gatishmëri për t’iu përgjigjur shpejt çdo përshkallëzimi ose komplikimi.
(r.m.)