Prishtinë, 7 dhjetor 2022 – Shtetet e Bashkuara vlerësojnë se, aktualisht, nuk ka kushte për mbajtjen e zgjedhjeve në veri të Kosovës, më 18 dhjetor.
Ambasadori amerikan në Kosovë, Jeffrey Hovenier, ka thënë se siguria e të gjithë qytetarëve të Kosovës duhet të jetë prioriteti më i lartë.
“Shtetet e Bashkuara dënojnë ata që ushtruan dhunë gjatë incidenteve të djeshme në veri të Kosovës. Kthimi kah dhuna dhe frikësimi, përfshirë përdorimin e një mjeti shpërthyes dhe rrezikimin e jetëve, nuk është mënyrë e përshtatshme e protestë, kurrë dhe në asnjë rrethanë.
Shtetet e Bashkuara janë të shqetësuara sepse për momentin nuk janë krijuar kushtet që zgjedhjet në veri të Kosovës të mbahen në fund të këtij muaji. Siguria dhe siguria e të gjithë qytetarëve të Kosovës duhet të jetë prioriteti më i lartë. Ne kërkojmë nga të gjitha palët e përfshira që të jenë të përmbajtur”, ka shkruar ambasadori Hovenier në Twitter.
The United States condemns those who employed violence during yesterday’s incidents in northern Kosovo. Resorting to violence and intimidation, including use of an explosive device, and endangering lives is never an appropriate method of protest, under any circumstances. 1/2
— Ambassador Jeff Hovenier (@USAmbKosovo) December 7, 2022
Ambasadori Hovenier i bëri këto komente një ditë pasi grupe të qytetarëve serbë në pjesën veriore të Kosovës e penguan hapjen e zyrave të Komisionit Qendror të Zgjedhjeve. Në zyrat e Komisionit pati edhe incidente me armë zjarri dhe me mjete shpërthyese.
Zgjedhjet në katër komunat e banuara me shumicë serbe në pjesën veriore të Kosovës (Mitrovicë Veriore, Zubin Potok, Leposaviq e Zveçan) u shpallën pasi kryetarët e tyre dhanë dorëheqje në fillim të nëntorit, në shenjë kundërshtimi ndaj vendimit të Qeverisë së Kosovës për riregjistrimin e automjeteve me targa ilegale të lëshuara në Serbi.
(r.m.)