Prishtinë, 7 dhjetor 2022 – Shefi i EULEX-it, Lars-Gunnar Wigemark, dhe ambasadori gjerman në Kosovë, Jorn Rohde, kanë thënë se janë të shqetësuar për situatën në veri të vendit.
Wigemark ka shkruar në Twitter se është i shqetësuar me incidentet e djeshme në veri dhe se “çdo protestë duhet të jetë paqësore dhe të gjithë duhet të qëndrojnë të qetë dhe të përmbajtur”.
Ai tha se EULEX-i do të vazhdojë ta monitorojë situatën në koordinim të ngushtë me Policinë e Kosovës dhe KFOR-in.
Ambasadori gjerman në Kosovë, Jorn Rohde, ka shpërndarë postimin e Wigemarkut në Twitter, dhe ka shkruar “vërtet shumë shqetësuese”, duke shtuar që ai mbështetë protestat paqësore, por duhet të ketë “zero tolerancë ndaj dhunës”.
“Dhuna e djeshme ndaj zyrave të komisioneve komunale zgjedhore është e papranueshme”, ka thënë Rohde.
Very concerning indeed. Yesterday's violence against municipal election offices are unacceptable. Good that KP in coordination with EULEX and KFOR is present. Full support for peaceful demonstrations but zero tolerance for violence. https://t.co/cYmwS19kuK
— Ambassador Jörn Rohde (@GermanAmbKOS) December 7, 2022
Edhe ambasadori i Shteteve të Bashkuara të Amerikës në Kosovë, Jeffrey Hovenier, tha se aktualisht në veri të Kosovës nuk ka kushte për mbajtjen e zgjedhjeve. Ai theksoi se siguria e të gjithë qytetarëve të Kosovës duhet të jetë prioriteti më i lartë.
Këto komente vijnë një ditë pasi grupe të qytetarëve serbë në pjesën veriore të Kosovës e penguan hapjen e zyrave të Komisionit Qendror të Zgjedhjeve në Mitrovicë Veriore, Zubin Potok, Zveçan dhe Leposaviq. Në zyrat e Komisionit në Mitrovicë Veriore dhe Zubin Potok pati edhe incidente me armë zjarri dhe me mjete shpërthyese.
Zgjedhjet në katër komunat e banuara me shumicë serbe në pjesën veriore të Kosovës u shpallën pasi kryetarët e tyre dhanë dorëheqje, në shenjë kundërshtimi ndaj vendimit të Qeverisë së Kosovës për riregjistrimin e automjeteve me targa ilegale të lëshuara në Serbi.
(r.m.)