Bruksel, 17 nëntor 2023 – Sekretari i Përgjithshëm i NATO-s, Jens Stoltenberg, do ta vizitojë Kosovën, të hënën, 20 nëntor, në kuadër të një vizite në disa vende të Ballkanit Perëndimor.
Stoltenberg pritet të takohet në Prishtinë me Presidenten e Kosovës, Vjosa Osmani
Sipas njoftimit të NATO-s, gjatë turneut të tij në Ballkanin Perëndimor, Stoltenberg do ta vizitojë Bosnje e Hercegovinën, Serbinë dhe në Maqedoninë e Veriut.
Zyrtarët shtetërore të Kosovës kanë shprehur disa herë synimin për t’u bërë pjesë e Bashkimit Evropian dhe NATO-s.
Vitin e kaluar, kryeministri i Kosovës, e ka përmendur se synon që vendi të anëtarësohet në programin e NATO-s, Partneriteti për Paqe.
Shtetet e Bashkuara e kanë mbështetur këtë vendim të Kosovës, ndonëse kanë tërhequr vërejtjen se për një anëtarësim të tillë duhet miratim i të gjitha vendeve të aleancës.
Nga 31 vende anëtare të NATO-s, Kosovën si shtet të pavarur e kanë njohur 27 prej tyre ndërsa katër (Greqia, Rumania, Sllovakia dhe Spanja) ende jo.
Partneriteti për Paqe është një program i NATO-s, që synon krijimin e besimit midis shteteve anëtare të NATO-s dhe shteteve të tjera në Evropë.
Aktualisht, NATO-ja është e pranishme në Kosovë me misionin e saj paqeruajtës, KFOR.
Deri në nëntor të vitit 2023, pjesë e këtij misioni kanë qenë 4.687 trupa të 27 vendeve të botës.
(REL)