(E përditësuar)
Varshavë, 15 nëntor 2022 – Një zyrtar i lartë i inteligjencës amerikane, tha se raketat ruse goditën edhe në Poloni ku vranë dy persona, raporton AP.
Zëdhënësi i qeverisë polake, Piotr Mueller, konfirmoi se dy shtetas polakë janë vrarë nga sulmet me raketa, por nuk dha detaje nëse raketat ishin nga Rusia.
Ai tha se Polonia e ka rritur gatishmërinë ushtarake dhe se po verifikohet nëse duhet të aktivizohet traktati i NATO-s.
Polonia është shtet anëtar i NATO-s.
Sipas Nenit 5 të NATO-s, të gjitha vendet anëtare janë të obliguara të ndihmojnë një vend tjetër anëtar, sovraniteti dhe integriteti territorial i të cilit mund të kërcënohet.
“Sulmi ushtarak kundër një anëtari do të konsiderohet si sulm ndaj të gjithëve”, thotë neni 5 i traktatit.
Më herët, mediat polake raportuan se dy persona vdiqën në fshatin polak Przewodow, i cili gjindet pranë kufirit me Ukrainën.
Pentagoni tha se nuk mund t’i konfirmojë këto raportime.
“Ne jemi të vetëdijshëm për raportimet e mediave, të cilat pretendojnë se dy raketa ruse kanë goditur një vendndodhje brenda Polonisë, afër kufirit me Ukrainën. Mund t’ju them se ne nuk kemi asnjë informacion në këtë moment për të vërtetuar këto raportime dhe jemi shikuar këtë çështje edhe më tej”, tha ka thënë koloneli Patrick Ryder, një zëdhënës i ushtrisë amerikane.
Presidenti ukrainas, Volodymyr Zelensky, ka akuzuar Rusinë për sulm të qëllimshëm ndaj Polonisë.
“Ky është një sulm raketor rus ndaj sigurisë kolektive”, tha ai.
“Ky është një përshkallëzim shumë domethënës. Ne duhet të veprojmë”, ka shkruar ai në Telegram.
Ministria ruse e Mbrojtjes mohoi se raketat e saj kaluan në Poloni, duke i quajtur raportimet një “provokim të qëllimshëm”.
Mediat shtetërore ruse kanë lënë të kuptohet se ishin në fakt raketat ukrainase, dhe jo ruse, ato që goditën territorin polak. Këto pretendime janë të pabazuara.
I pyetur për këto zhvillime, një zyrtar i NATO-s i tha BBC-së se janë duke i shqyrtuar raportimet, dhe se po koordinohen ngushtë me aleatin e tyre, Poloninë.
Reagimet ndërkombëtare
Derisa Këshilli i Sigurisë Kombëtare po mban mbledhje urgjente, Qeveria e Polonisë po merr më shumë shprehje mbështetjeje nga aleatët e NATO-s.
Ministrja e Jashtme gjermane, Annalena Baerbock, tha se po e monitorojmë nga afër situatën dhe se janë në kontakt me “miqtë tanë polakë dhe aleatët e NATO-s”.
Kryeministri holandez, Mark Rutte, tha se “është e rëndësishme tani të përcaktohet se çfarë ka ndodhur saktësisht”.
Presidenti francez, Emmanuel Macron, tha gjithashtu se është në kontakt me Poloninë dhe se për këtë beson se do të diskutohet nesër në samitin e G20-ës.
Presidenti i Këshillit Evropian, Charles Michel, ka shkruar në Twitter se është i tronditur nga lajmi se një raketë ka vrarë njerëz në territorin polak.
“Ngushëllimet e mia për familjet. Ne qëndrojmë me Poloninë. Unë jam në kontakt me autoritetet polake, anëtarët e Këshillit Evropian dhe aleatët e tjerë”, ka thënë ai.
Ka reaguar ministria e Jashtme e Estonisë, ku ka thënë se është e gatshme të mbrojë çdo pëllëmbë të territorit të NATO-s.
“Lajmet e fundit nga Polonia janë më shqetësuese. Ne jemi duke u konsultuar ngushtë me Poloninë dhe aleatët e tjerë. Estonia është e gatshme të mbrojë çdo pëllëmbë të territorit të NATO-s. Ne jemi në solidaritet të plotë me aleatin tonë të ngushtë Poloninë”, thuhet në postimin e kësaj ministrie në Twitter.
Edhe presidenti i Lituanisë, Gitanas Nauseda, tha se duhet mbrojtur çdo pëllëmbë të territorit të NATO-s dhe se vendi i tij qëndron në solidarite të plotë me Poloninë.
Kryeministri çek, Petr Fiala, ka thënë se nëse Polonia konfirmon se raketat kanë goditur edhe territorin e saj, ky do të jetë një përshkallëzim i mëtejshëm nga Rusia.
“Ne qëndrojmë fort pas aleatit tonë në BE dhe NATO”, ka shkruar ai në Twitter.
Të martën, më 15 nëntor, Rusia sulmoi me raketa Kievin dhe disa qytete tjera ukrainase, ku raportohet për të paktën një person të vrarë.
Ky duket të jetë një sulm mbarëkombëtar, pasi sulme të njëjta po raportohen edhe në Zaporizhja Mykolaiv, Chernihiv dhe vende tjera.
Presidenti ukrainas, Volodymyr Zelensky, tha se 85 raketa janë lëshuar kundër Ukrainës të martën dhe 20 të tjera pritet të godasin vendin.
Ky sulm u krye në kohën që liderët botërorë të mbledhur në samitin e G20-tës, apo grupit të vendeve më të industrializuara, në Bali të Indonezisë, e dënuan pushtimin rus të Ukrainës.
Shtetet e Bashkuara i kanë dënuar ashpër këto sulme.
Javën e kaluar Moska i ka tërhequr trupat e saj nga qyteti jugor Herson. Ky cilësohet si një nga sukseset më të mëdha të Ukrainës në luftën e saj kundër pushtimit rus.
Në të kaluarën, kur Rusia ka pësuar humbje në terren, ajo ka sulmuar përmes ajrit.
(Sipas REL)